As jy ‘n ou hand op die internet is, ken jy dit seker:
Jy begin deelneem aan ‘n blog of forum waarvan jy hou. Daar daag later iemand op wat gruwelik beledigend is, of ellelange poste vol twak praat, of op ‘n ander manier net die blog of forum se hele karakter verander. Dalk het só iemand al by jou blog opgedaag. Wat nou gemaak? Hoe maklik mag mens iemand blok, sodat sy kommentare nie kan verskyn nie?
Jy mag dalk selfs ‘n etiese probleem hê met die saak: Die soort trolle wat jou forum of gunsteling-blog binneval, het natuurlik ook vryheid van spraak. Beperk jy iemand se vryheid van spraak as jy hom jou blog verbied? Beperk ‘n forum-moderator die trol se spraakvryheid as hy dit doen?
Ek sien die saak só: Veronderstel ek skryf ‘n brief aan Huisgenoot/ Vrouekeur/ watter tydskrif ookal, met die idee dat dit op hulle brieweblad verskyn. Hulle kies om dit nie te publiseer nie. Hulle het dan nie my spraakvryheid belemmer nie. Hulle het bloot nie vir my ‘n mikrofoon geleen nie.
Dieselfde met enige ander publikasie: Mens kies wat jy in jou publikasie wil hê. Om te kies wat jy wil publiseer en wat nie, is deel van jou vryheid van “spraak.” As jou publikasie ‘n blog of ‘n forum is, waarom moet die reêls anders wees? As iemand jou blog lelik maak, blok hom as jy so voel, sê ek. Dis jou blog, jy het begin blog oor jy dit geniet. Moenie dat jou lesers/ kommentaar-leweraars heeltyd in irriterende twak vaskyk nie. En as iemand jou gunsteling-forum lelik maak, moenie sleg voel as jy die moderator vra om hulle te verban nie. Spraakvryheid kom nie in gedrang nie. Dis debateerbaar of “Oopkop luister” in die gedrang kom.
En as jy geblok word iewers? As jy nie jou opinie op ‘n bepaalde koerant of blog of forum mag sit nie? Dan beoefen jy jou vryheid van spraak elders. Ons in die blogosfeer kan in elk geval nie maklik stil gemaak word nie.
Wat dink julle? Hoe maklik moet/ mag mens iemand blok? Wat is swak/ eties onaanvaarbare redes om iemand uit te blok? Waarvoor sal jy iemand nie meer op jou blog toelaat nie? Het jy al mense gekeer om aan jou blog deel te neem? Moes jy al inskrywings uitvee?
February 1, 2009 at 5:31 nm
Jou blog, jou keuse. Vandaar my kategorie SNERT.
February 2, 2009 at 8:56 vm
Retha, ek stem saam met Emil… Hoekom moet jou blog bemors word met mense wat geen “etiket” het nie!!
Ek dink as die persoon aanhoudelik jou blog “bevuil” moet jy hom/haar blok.
February 2, 2009 at 6:17 nm
Ek is ‘n baie groot teenstaander van kommentaar uitwis, mits dit sinvolle kommentaar was. As iemand begin flame, sal ek dit nog steeds nie uitwis nie (flamers grawe hul eie gat wat beeldvorming aanbetref), maar ek dink dan sou ‘n mens kon maak soos Emil.
Ewenwel, die oplossing is eintlik bedrieglik eenvoudig. Iemand moet ‘n plugin skryf sodat admins kommentaar kan tag as “FLAME” of iets dergeliks en dit slegs as ‘n expandable tab kan vertoon (baie soos wat YouTube doen).
Die oplossing vir alles is in die Kode(tm)
February 2, 2009 at 9:09 nm
‘n Blog is jou persoonlike spasie. As blogger doen jy ander ‘n “guns” om hul insae in jou persoonlike spasie te gee, dus, jy het die reg om te besluit wie wat op jou blog mak kwytraak. Ek moderate my kommentaar omdat ek kan en omdat ek mag. Eenvoudig soos dit.
Ek dink nie “vryheid van spraak” is van toepassing op persoonlike blogs nie soos dit van toepassing is op koerante nie. As jy iets wil sê, gaan maak jou eie blog oop en sê dit daar vir almal wat dit wil lees. Moenie jou stront op my blog kom spoeg nie. Debateer met my ja, verskil van my ja, maar bly by die onderwerp en moenie laster nie.
February 3, 2009 at 5:55 vm
Dankie, almal.
Net een ding om te verstaan: Ek veee nie uit oor mense van my verskil nie. (As jy nie met my saamstem nie, gee detail: Hoe bewys jy my standpunt verkeerd? En wat is die slimmer standpunt? Moenie vir my sê: “Hoe kan enigiemand [idee X] glo? Dis lagwekkend.” nie. Vertel my: “[Idee X] is belaglik, want [deeglike redenasie]“. Ek het nog nooit ‘n redenasie uitgevee nie. As ek verkeerd is, wil ek gekorrigeer word.)
Neil som my opinie goed op: “Debateer met my ja, verskil van my ja, maar bly by die onderwerp en moenie laster nie.”
February 3, 2009 at 8:40 vm
Nee, maar ek verskil. ‘n Blog is nie jou persoonlike spasie nie. Dis ‘n baie belangrike onderskeid om te tref. Jy besit hom dalk, maar hy’s nie jou binnekamer nie.
Die internet is publieke domein. Jou gedagtes is nie net jou gedagtes nie – dis ook scrapers en aggregators en ander visitors s’n.
Dis op die internet. Dit kan nooit persoonlik wees nie.
February 3, 2009 at 4:03 nm
Hier moet ek met Johan saamstem – as jy jou gedagtes ontbloot, kan dit onmoontlik soos ‘n dagboek wees. Het al eenkeer iemand se opmerking delete, want dit was ‘n simpel buitestaander wat wou bollie maak.
February 3, 2009 at 5:04 nm
‘n Mens se blog is soos jou tuin. Jy bestee tyd daaraan, dit is iets wat jy daarstel om jou eie redes, ander kan kom kyk maar dit maak dit nie hulle s’n nie. So besluit self op ‘n strategie en pas dit konsekwent toe. Dis heeltemal jou keuse.
February 3, 2009 at 10:49 nm
Ek is in akkoord met Sammi en Johan. Sodra jy xxx.wordpress.com o xxx.co.za of xxx.net of xxx.com en watter permutasies en mutasies ookal aktief maak, is dit altoos in die publieke domein. Wat jy dan daar kwytraak, is vir enigeen se skrobering en skandering en eksegese. Anders kan jy moes maar lief in jou klein swartboekie skryf en in jou bo-sak rond dra.
Aan die anderkant weer, die konsep ‘vryheid van spraak’ word darem ook wild en wakker misbruik. Ek het ‘n broertjie dood aan mense wat dink hulle kan kom mors onder daardie vaandel. Ek het werklik nog net 9 keer sedert ek blog, “uitgevee” – die kommentaar is nog daar, net in die modderboksie gedompel. Dit is voordat ek ‘n dieper ondersoek na SNERT gedoen het. Nou los ek dit, net om darem te wys die vermiste skakel tussen mens en bobbejaan bestaan wel
Sedert ek my kategorie SNERT begin het, het ek nog nie weer probleme gehad nie. Daarmee saam, ek is ook meer oordelkundig in my keuse waar en wanneer ek deelneem.
Dalk het my nuutgevonde vrede ook iets te make met die feit dat baie van die Gemene Delers op ander plekker blootgestel is.
February 3, 2009 at 10:51 nm
Maar bygesê, dit is steeds ieder en elke se eie keuse hoe hy sy spasie op die Internet bestuur.
Johan, daardie kode klink na ‘n goeie idee, maar dit bestaan mos reeds – ons noem dit SPAM
February 4, 2009 at 9:32 vm
Dalk het ek nog nie met trolle te doen gehad nie, maar ek dink nie ek sal sommer ‘n comment delete nie. Nie dat ek ander kwalik neem wat dit wel doen nie, ne! Kan nie presies verklaar hoekom nie, maar ek dink dit het iets te doen met die feit dat die delete-knoppie nie regtig van daardie mens ontslae raak nie. Hy/sy bestaan steeds en sy opinie oor my of my inskrywing gaan nie verdwyn nie. Simpel?