Behoort vroue te kan stem?

Eendag het ‘n anti-geweer groep plakkate op ‘n kampus opgeplak. Die plakkate het die bewoording gehad: DISARM NOW!

Die volgende dag toe die studente weer verby die plakkate loop, het iemand op verskeie plakkate bygeskribbel: DAT ARM NEXT!

Een Baie Geopinioneerde Blogger wat ek lees, reken dat wette teen vuurwapens vroulike kiesers se skuld is. Tot daar is hy waarskynlik reg. Dan gaan hy verder. Volgens hom behoort vroue nie te stem nie, want hulle stem gewoonlik vir die verkeerde goed, dinge wat die samelewing minder vry maak.

Ek kan verstaan, liewe leser, as jy tans ontsteld is: Watter soort misogeniese Neandertal reken dat vroue nie moet stem nie? Hy vertel dat Europese en Amerikaanse samelewings heelwat minder vry geword het sedert en omdat hulle vroue stemreg gegee het. Sy argumente het my nie oortuig nie, want samelewings word in elk geval minder vry. Nuwe wette kom makliker by as wat ou wette van die boeke af gaan. En die één land waar mans kan stem en vroue nie – Saudi Arabië- is geensins ‘n voorbeeld van ‘n vry land nie.

Tot ek vandag hierdie gelees het. Steve Hofmeyr spreek homself uit ten gunste van ‘n mediatribunaal, want die media vertel lelike goed van hom. En vertel dat hy tot die politiek wil toetree.

Toe tel ek die kommentare met mansname by, en díé met vrouename by. Vir die doel van die telling was kommentaar met androgene byname soos C v R, Steve bo! of Huh? geignoreer. Mens weet nie of dit van mans of vroue kom nie.

> Uit 17 vroulike en 20 manlike kommentare het 10 vroue en 3 mans Steve verdedig of gekomplimenteer. 2 vroue en 1 man het gesê hulle sal vir Steve stem.

> 6/17 vroue en 10/20 mans het hulle teen Steve uitgespreek.

> 1/17 vroue en 5/20 mans het gepraat teen ‘n media-tribunaal. *

> 5/20 mans en geen vroue het hulself ten gunste van só ‘n tribunaal uitgespreek.

Of te wel, helfte van die mans en 16 uit 17 vroue het die politieke punt gemis, en net oor Steve gepraat en nie oor ‘n mediatribunaal nie. En dit laat my vir die eerste keer wonder: Is dit regtig so ‘n goeie ding dat vroue stemreg het?

Aan die ander kant, mnr. Baie Geopinioneerde Blogger sal nie noodwendig sy vry samelewings sien as vroue nie stem nie. Helfte van die mans wat oor só ‘n tribunaal gepraat het, was ten gunste daarvan…

——————————————————-

Naskrif:

* Die manssyfers tel nie presies op nie oor verskeie mans hulle oor sowel Hofmeyr as oor ‘n mediatribunaal uitgespreek het.

Ander nota: Hierdie is ‘n besprekingspunt, nie ‘n opinie nie. Maar jy is seker slim genoeg om dit te sien.

Kan ek die Bybel vertrou? En wat van die teenstrydighede?

Gregory Koukl verdedig die gesag van die Bybel so(1): Hy bekyk eers die vraag: Is daar iets inherent teenstrydig aan die gedagte dat die Bybel die Woord van God, neergeskryf deur mense, is? Die gevolgtrekking wat sy redenasies hom gee, is “Nee, daar is nie.”

Dan vertel Koukl:

I do think, however, that the burden of proof is upon the Bible to demonstrate that what it says is, in fact, true. It does say throughout, especially in the Old Testament, things like “and God said,” “thus saith the Lord,” etc.

Hy bespreek verskeie dinge wat in die rigting van skrif-betroubaarheid dui. Die getuienis van Jesus dui byvoorbeeld daarop, indien jy glo Jesus is betroubaar.

Dan begin hy by die aanname dat die Bybelboeke bloot dokumente is wat beweer dat hulle geskiedenis weergee, en toets of dit goeie geskiedenis is.(2)

Sy gevolgtrekking is dat die Bybel akkurate geskiedenis weergee. As dit ons dan by die gevolgtrekking bring dat die Bybel die waarheid praat, dan gee dit ons ‘n goeie rede om die Bybel te hanteer asof die Bybel reg is. Om klaarblyklike teenstrydighede te hanteer(3) asof jy die een is wat nie alles verstaan nie, nie asof die Bybel verkeerd is nie. Na alles is Jesus- wat uit die Bybel aangehaal en die Bybel geglo het, en selfs gesag gegee het vir Bybelskrywers ná Hom(4), die een wat uit die dood opgestaan het om te wys jy kan Hom vertrou. Jy het nie uit die dood opgestaan om jou opinie te bewys nie.

Naskrif

(1) Sien http://www.str.org/site/News2?page=NewsArticle&id=5125

(2)Sien ook die skakels onder punte A1 en A2 van “Om Jesus te volg maak sin”

(3)Klaarblyklike teenstrydighede te hanteer: Sien ook “Ek sien foute in die Bybel! Wat nou!” Deel 1 en Deel 2

(4) http://birdsoftheair.blogspot.com/2009/08/biblical-inerrancy.html

Christenskap en gaaf-enskap

“Jesus”, vertel die Sondagskooljuffrou, “was gaaf met almal. Ons moet ook gaaf wees met almal. God het almal baie lief. Ons is almal sy kinders.”

Kobus glo dit. En Kobus word ouer, soos wat maar met alle kinders gebeur. En Kobus hoor dat Jesus dinge gedoen het soos om handelaars uit die tempel te verdryf en mense te vertel dat ellende vir hulle wag. Hy lees Jesus het soms skelwoorde soos “addergeslag” gebruik. Kobus vermoed dat wat hy in die Sondagskool geleer het nie waar is nie.Kobus onthou nog veral twee dinge uit die Sondagskool:

1) God was gaaf en liefdevol met almal.

2) Ons moet gaaf en liefdevol wees met almal.

En Kobus hoor van dinge in die Bybel soos dat God die hele Sodom en Gomorra uitgewis het, en ander Bybelverhale waarin God allesbehalwe gaaf en lieftallig was. Hy glo nog die tweede een- dat hy gaaf en liefdevol moet wees. Nou glo Kobus hy is meer moreel as die Bybel se God. En Kobus verwerp geloof, oor die geloof wat hy kleintyd geleer het nie die ware geloof is nie.

Punt van die verhaal?

1) As jy ‘n ouer is, of op een of ander manier kinders van God leer, moenie vertel dat God altyd goed en gaaf is met almal, of dat ons almal God se kinders is, nie. Want die Bybel beeld Hom nie so uit nie. Vertel oor die algemeen dit wat jy glo, en niks wat jy self weet nie waar is nie.

2) As jy iemand is wat besef dat dit wat jy kleintyd by die kerk geleer het nie die Bybelse waarheid is nie, verwerp gerus wat jy geleer het. Maar moenie aanneem dit wat jy geleer het is Christenskap, en dan Christenskap laer ag nie. Want gaaf-enskap is nie Christenskap nie.

Sulke varke!

Grond hervorming is ‘n slegte idee, want op kollektiewe grond wat aan die owerhede behoort, vat niemand verantwoordelikheid soos op hulle eie plase nie.

Grond hervorming is ‘n slegte idee, want iemand wat boer net oor hy spesiale hulp van die staat gekry het, is nie ‘n boer se alie nie.

Uit Vista, die plaaslike koerant van die Vrystaatse Goudvelde:

Maak toe, toe daai kinderbybel: Ons is nie almal kinders van God nie!

Jy is ‘n gelowige. Jy is lief vir God se woord. Jy wil dit graag in die hande van oud en jonk sien. Jy glo dat jy Sy kind is, en dan ook op verse soos:

Aan almal wat Hom aangeneem het, die wat in Hom glo, het hy die reg gegee om kinders van God genoem te word. – 1 Joh. 1:12

God het die wêreld so lief gehad dat Hy sy eniggebore Seun gestuur het, sodat die wat in Hom glo nie verlore sal gaan nie, maar die ewige lewe sal hê. Joh 3:16

En dan lees jy van projekte wat Bybels en kinderbybels versprei. Christelike Lektuurfonds het byvoorbeeld ‘n projek om 1 miljoen eksemplare van Biskop Tutu se “Children of God” kinderbybel te versprei. Dit word geadverteer met pragtige fotos van Tutu omring deur kinders. Jou eerste gedagte is om te wil help, maar dit sal teenproduktief wees.

Want daardie kinderbybel, en Tutu homselwers, vertel ongelukkig ‘n anti-Christelike storie. Die Bybel vertel dat net party mense kinders van God is. Tutu se boodskap, oral en nie net in hierdie kinderbybel nie, is “We are all children of God.” Die Bybel vertel nie dat alle mense God se kinders is nie. Die boodskap “almal is God se kinders” hou mense weg van God af. Mense dink dat hulle nie nodig het om na God te kom nie, want hulle glo hulle is reeds God se kinders.

Die kinderbybel vertel “dat kinders die liefde, omgee en vrede van God moet gaan uitleef – teenoor almal.” Lieflik- en driekwart van die storie. Want Jesus het ook gekom “nie om vrede te bring nie, maar die swaard.” En daai soort “liefde vir ander mense” wat in daardie soort boodskap verkondig word, maak dat kinders dink liefde beteken om die skoolboelie te laat begaan, en dink liefde beteken om nie vir mense van ander gelowe te vertel daar is net een pad na Christus nie.

Die eerste verhaal in “God se kinders” waarvan ek ‘n voorbeeld kan kry, wyk al in sin 3 van die evangelie af: “Jesus het almal liefgehad en vriendelik behandel.”, aldus Tutu. Almal liefgehad? Glo so. Almal vriendelik behandel? Wel, Jesus se uitdrukkings soos “addergeslag” of om sy vriend Petrus “Satan” te noem, of “ellende wag vir jou, Kapernaum” is nie veel vriendeliker as wat Hy was toe hy mense met swepe weggejaag het nie.

En waarom het Jesus nie almal vriendelik behandel nie? Want dis nie liefdevol om iemand wat op die verkeerde pad is te laat dink Hy is op die regte pad nie. Liefde wys waar om die regte pad te vind. En dis presies waarom die “Ons is almal kinders van God” boodskap so gevaarlik liefdeloos is.

Wil jy graag ‘n boek vir kinders borg om hulle van God te leer? Borg liewer Wonderboek. Dit leer kinders  baie meer, is heelwat goedkoper en ook beskikbaar in baie tale.  (Die prente hier onder is so ‘n paar bladsye uit Wonder Book.)