Kinderles oor alles wees wat God jou roep om te wees: Kennisgewing

Ek het ‘n nuwe les uit oor om alles te wees wat God jou roep om te wees, en jou nie aan mensgemaakte beperkings te steur nie, maar dis in Engels geskryf en is beskikbaar hier:
https://biblicalpersonhood.wordpress.com/2016/11/12/being-all-god-made-you-to-be-lesson-idea-for-childrens-church-sunday-school-at-an-egalitarian-church/

Kinderles: Kleingroep-Aktiwiteit: Les oor wysheid (Gr. 2-6)

Die doel van hierdie aktiwiteit is om waarhede oor wysheid en wat dit is speel-speel vas te lê. (Bv. na die Bybelverhaal oor Salomo wat wysheid kies in 1 Kon. 3) 

Vooraf: Druk die vrae en die antwoordkaartjies op papier uit, knip die kaartjie-blad in 10 stukke.

Die kinders neem as individue deel, nie as ‘n span nie. Laat hulle in ‘n sirkel gaan sit, met die tien kaartjies onderstebo in die middel. Lees die eerste leidraad: Daar is ‘n verskil tussen wys wees en slim wees. Slim is om ….  Vertel hulle die antwoord waarna hulle soek. Dit help hulle om dwarsdeur die soektog op die antwoord te fokus.

Dan kry die eerste kind ‘n kans om ‘n kaartjie om te keer en hardop te lees. (As ‘n kind swak lees, lees jy namens hom.)

Met ‘n Gr: 4-6 groep: As dit nie is nie, draai sy die kaartjie weer onderstebo, en kry die volgende kind ‘n beurt. (Hulle moet konsentreer: Waar is die verkeerde kaartjies? Ek moenie weer daardie kaartjie omdraai nie…) Met ‘n Gr. 2 groep: Los verkieslik die omgekeerde kaartjies regop op die plek waar dit omgedraai is.  Met Gr. 3’s, besluit self hoe skerp jou groep is.

Herhaal, soos hulle beurte voortgaan, die waarheid van die vraag waarmee hulle besig is, bv. : “Daar is ‘n verskil tussen wys wees en slim wees. Slim is om … baie dinge te weet en om moeilike dinge te kan uitwerk”. Die kinders kry beurte in die sirkel tot die regte antwoord getrek word. Bespreek die antwoord. Haal daardie antwoord-kaartjie uit. As die ander kaartjies regop is, draai hulle weer onderstebo.

Herhaal met die 2de vraag, en elke volgende vraag. Soos die kinders begin onthou waar kaartjies is, en die kaartjies minder word, sal elke rondte korter word.

Vrae

1) Daar is ‘n verskil tussen wys wees en slim wees. Slim is om … baie dinge te weet en om moeilike dinge te kan uitwerk (soos moeilike somme)

2) Wys is om … goeie besluite oor die lewe te neem

3) Die wysste keuse wat mens kan maak is om … te kies om Jesus aan te neem.

4) As iemand jou sleg behandel … bly glo God het jou waardevol gemaak.

(By die bespreking-deel vertel jy dat dit ‘n wyse ding is om oor jouself te glo.)

5) As iemand iets voorstel wat na pret klink, maar iemand kan sleg seerkry … moet dit nie doen nie.

6) Die Bybelboek vol kort sêgoed oor wysheid is … Spreuke.
(Vertel hulle van hier af gaan al die vrae kort Spreuke-wyshede wees.)

7) Wysheid begin by … om die Here te dien

8) Liewer min hê en reg lewe … as baie inkomste hê deur onreg.

9) Die waarheid hou vir altyd… die leuen net ‘n oomblik.

10) Yster slyp yster… vriende vorm mekaar

wysheid

‘n God vir twyfelaars, vraag-vraers, worstelaars en diegene wat ongeseënd voel

Genesis 32:22-32

Party goed in die Bybel is moeilik om te verstaan. Vat nou die storie waar Jakob deurnag met ‘n man stoei en om seën vra. Hy vertel na die tyd dat hy met God en mens geworstel het. Dit verstaan ek nie.

Kan mens letterlik met die almagtige skepper van hemel en aarde stoei? God sal enige mens oorrompel voor die stoeigeveg begin! As dit ‘n mens was, hoekom vertel hy daar dat Hy God van aangesig tot aangesig gesien het?

Maar in elk geval, na die tyd hoor Jakob (sy naam beteken figuurlik bedrieër) dat hy ‘n nuwe naam kry: Israel. Israel, soos ons almal weet, is nie net die naam van ‘n man nie, maar van die volk waarvan hierdie man die voorvader is. God se volk. Israel beteken “hy worstel met God.”

Daardie naam is goeie nuus! Want as die volk se naam “gehoorsaam aan God” was, dan kon ek begin twyfel het sodra ek ongehoorsaam is: Is ek nog deel van God se volk?

As die volk se naam “glo aan God” was, sou daar nie plek gewees het vir jou as jy begin twyfel nie.

As die volk se naam “die God-prysers” was, dan sou ons kon wonder of God minder van ons God is wanneer ons sukkel om te lofprys.

Maar God se volk is díé mense wat met Hom worstel: Wat met hulle twyfel na Hom toe gaan, en hul twyfel-kwessies deurbid. Wat met alles wat nie sin maak in die Bybel nie, steeds na God en Sy wil bly soek in die teks. Wat met al die lelik in die wêreld nie weghardloop van God nie, maar worstelend hulle “Here, hoekom?” vir die Skepper bly vra. Wat ten midde van “Here, hoekom” se tragedies nog steeds vir God se seën stoei. Sy seën op die aarde. Op jou geliefdes. Op jouself.

Daardie mense, die mense wat met God bly ‘n pad stap selfs in die worstel-tye, is God se volk.

 

Wie die hardste skree, opvolg: Vrede maak met myself

He’s not wrong he’s just different, but his pride won’t let him do things to make you see he’s right – uit “Mamas don’t let your babies grow up to be cowboys”

(Waarskuwing: As jy nie wil hoor hoe mense oor hulself praat nie, vermy hierdie inskrywing.)

‘n Ander kategeet-wat-nie-meer-kategese-gegee-het-nie het my eenkeer, nadat ek weggejaag is, iets toegesnou wat neerkom op: “Dis baie aaklig van jou om uit te praat. Mense soos ek het waardes en is bly die kategese is ontslae van mense soos jy.”

Nou verstaan ek dat daar meer as een soort waardestelsel is: Die een soort gaan veral oor lojaliteit, gehoorsaamheid aan gesag en suiwerheid (‘n gemeenskap-waardestelsel). Die ander gaan oor regverdigheid, sorg, en eerlikheid (‘n individuele waardestelsel). Continue reading

‘n Snaakse droom?

Ek het laasnag ‘n besonder helder droom gehad, en die inhoud was vir my ontstellend toe ek wakker word:

Op ‘n strand sien ek ontvoerders, meer as een velkleur, wat vasgebinde, geblindoekde gevangenes lei na 2 karre toe. Die karre is opsigtelik en helderkleurig beskilder met goed soos palmbome, branderplanke, en eiland-drankies met sambreeltjies.

Ek probeer skree: “Haai, wat doen julle? Los daai mense!” maar word geignoreer. (Terloops, in die regte wêreld, anders as in my droom, sal ek nie probeer om waarskynlik gewapende ontvoerders se aandag te trek nie.) Continue reading

Kinderles: Almal is welkom by God – Handelinge 10

ALMAL IS WELKOM BY GOD

Bybelgedeelte:

Handelinge 10

Aktiwiteit:

Laat omtrent 8 kinders voor by jou kom staan (as dit ‘n groot groep is.) 6 van hulle sit hulle arms om die kind langs hulle se lywe/ nekke om ‘n omhelsende kring te vorm. Twee ander moet probeer om deel te word van die kring, sodat hulle ook daar arm-om-die-nek/lyf met die ander staan. Die res probeer hulle uithou. Stop dit na enkele minute en stuur hulle terug sitplekke toe. (As dit ‘n klein groep is, laat al die kinders deelneem.)

Les:

Inleiding:

In hierdie speletjie het party kinders ander probeer uithou – hulle het gedink daardie kinders hoort nie in hulle kring nie.

Ken julle mense wat party ander mense nie by hulle soek nie? Party mense dink hulle is beter as ander oor hulle ryk is. (Wys die prent van ‘n luukse huis, ‘n kleiner huisie, en ‘n plakkershut.)

Party kinders dink hulle is beter as ander oor hulle goed doen op skool. (Wys ‘n prent van ‘n kind wat sy/ haar hand opsteek.) Dan wil hulle nie maats hê wat nie ryk is, of wat sukkel op skool nie.

Party kinders, sê nou maar hulle speel met ‘n bal, wil nie kinders laat saam speel wat nie so goed soos hulle met die bal-speletjie is nie.

Dink julle God dink ook so? Vertel hy ons moet mense wat anders is uit ons groep hou? Kom ons kyk hoe God oor sulke verskille dink. Continue reading

Ek? ‘n Inspirasie?

Nou die dag gebeur ‘n snaakse ding. Iemand vertel my dat ek “so ‘n inspirasie” is.

Eintlik het dit begin as ‘n net-onder-normale, ietwat frustrerende Sondag: Die gemeente waar ek nou ‘n kategese gee is, volgens loop-afstand, eintlik nogal vêr van my huis af. Maar ek loop nooit Sondagoggende kerk toe nie, so dis geen probleem nie. Maar daardie oggend het ek nie my normale lift gehad nie, en ek wou nie iemand vra wat dit met ‘n slegte gesindheid sou doen nie, toe loop ek maar. Continue reading