Category Archives: Los gedagtes

Psalm 20 – ‘n beryming

Foto: Geleen op Internet

Deur Retha Faurie

Mag die Here jou hoor
in jou dag van nood.
Mag die God van Sion help.
O, Sy naam is groot.

Mag Hy jou offers onthou
en jou planne laat werk.
Mag Hy jou gee wat jou hart begeer,
dan juig ons as kerk.

Die Heer sal dat Sy kinders
in die stryd oorwin.
Uit die Heilige hemel
hul gebede gun.

Party vertrou op oorlog –
ons vertrou op die Heer.
Ons sal regop bly staan,
maar hulle val neer.

Heer verhoor tog ons gebed.
Ons sal roep – en U sal red.

__________________________________

Naskrif: As jy hierdie gedig van my wil toonset, kontak my. Jy kan my ook vra om hier en daar ‘n lettergreep of drie meer in te sit, of uit te haal, om by jou wysie te pas.

Die “sataniese” Ronald McDonald- skilder, en slegte motiewe

Het jy geweet dat, kragtens een van die belydenisse van Afrikaanse kerke soos die NG Kerk, een van hierdie twee prente sonde, soos in regte 10-gebooie-verbied-dit-direk-sonde is?

Michelangelo, The Creation of Adam

Kunswerk deur ‘n student by Grantleigh School, wat Ronald McDonald wys in die plek wat God op die vorige skildery inneem.

Het jy dalk nou verkeerd geraai? Die sondige kunswerk is Michealangelo se oorspronklike weergawe heel bo. Die Heidelbergse Kategismus se verstaan van die 10 gebooie is dat uitbeeldings van God sonde is.* Die punt van hierdie inleiding? Wat jy in hierdie kunswerke lees, is dalk nie wat die volgende persoon daarin lees nie.

Lees voort

Hoe moet ‘n konserwatiewe gelowige reageer op die NG Kerk se besluit oor gay insluiting?

Foto: Maroela Media

Die NG Kerk het eergister besluit dat gemeentes wat hulle weg oopsien om dit te doen (let wel: geen gemeente word verplig nie) gay paartjies mag trou, gay mense in die ampte mag hê, ens. (‘n Vorige soortgelyke besluit was al op ‘n tegniese punt herroep, glo oor vergaderingsprosedures nie reg gevolg is toe dit besluit is nie.) Soos voorspel, het konserwatiewe gelowiges onmiddelik krities begin reageer.

Dit is nie die mees Jesus-agtige reaksie is nie. As jy nou onmiddelik 5 of 6 versies vir my wil aanhaal, ontspan! Ek gaan nie nou redeneer dat jy jou idee oor gay omgang, of jou verstaan van daardie tekste, moet verander nie. Ek redeneer vir ‘n bril van liefde, ongeag hoe jy die betrokke groepie tekste verstaan wat jy nou wil aanhaal.

Liefde is immers die groot gebod, of dan die twee groot gebooie.

As jy vertel dat homoseksualiteit verkeerd is, praat jy nie in die eerste plek met die losbandige gay rondslaper-man nie. Hy sit waarskynlik nie in die kerk om jou te hoor nie. Jy praat met die 13-jarige Kelvin* wat lief is vir Jesus, die saggeaarde outjie wat nog nooit seks gehad het nie, maar begin besef hy hou van seuns eerder as meisies. Jy praat met Julia*, 16, wat reeds besef sy is “anders”, wat dalk ongewild is oor sy anders is.

Hierdie tieners is niks slegter as hulle maats net oor hulle seksuele versoekings anders is nie. As ons Christus se kerk wil in stand hou, moet ons ewe veel plek maak vir Kelvin en Julia en hulle aanmoedig om in Christus te leef, as vir die ander.

Trouens, ons moet dalk méér moeite maak. As jy Kelvin verwerp, en jy moedig sy ouers aan om skaam te voel oor hom, raai maar self waar hy binnekort gaan aandag soek. Nie oor hy slegter as die volgende tiener is nie, maar oor hy liefde ewe nodig het.

Dit wil vir my voorkom dat die gelowiges wat gay omgang sonde noem, eweneens moet sê:

“Ons mag gay mense in die ampte hê? Great! Ons wil baie graag ons weg oopsien om nie te diskrimineer teen mense nes ons wie se seksuele versoekings anders as ons s’n is nie! Gays, julle is welkom hier nes enigiemand anders, ons wil julle ewe welkom hê as ouderlinge/ predikante, mits julle lewe soos ons verstaan reg is. Ons besef dat ons julle nog meer moet ondersteun, nog meer ‘n geestelike familie vir julle moet wees, want selibaatheid is moeiliker as om te mag trou.”

Die God van die Evangelie is ‘n uitnooier en insluiter: Hy roep mense na Hom toe. Ja, God het idees oor reg en verkeerd. Maar Hy roep ons nie om onsself skoon te kry en dan na Hom te kom nie, Hy omhels ons nes ons is, en begin werk dan aan ons.

Hieraan weet ek die konserwatiewes is nie besig om God se wil te spreek nie: Gelowiges sal geken word aan die vrug van liefde. En nie één konserwatiewe gelowige wat ek gehoor het, het gereageer met taal wat gay vroue en mans, seuns en dogters, wil inroep in die kerk in nie.

Laat groei die kerk: Die Bybelse manier!

GROWTH.pngIs jy ‘n gelowige, en wil jy jou bediening laat groei? Hier is hoe dit in die Bybel gedoen is.

Handelinge 2:41, 2:47b, 4:4, 5:14, 6:1, 6:7, 9:31, 11:21, 11:24b, 16:5, 17:4, 17:12, 17:34, 18:8 en 19:10 vertel ons keer op keer:

3 000 mense is op daardie dag by die getal van die gelowiges gevoeg… die getal gelowiges het aangegroei… toe die gelowiges nog steeds meer geword het… die woord van God het verder versprei, en die getal gelowiges in Jerusalem het geweldig toegeneem… sodat daar baie mense tot geloof gekom het… ‘n aansienlike groep mense is tot geloof gebring… die getal gelowiges het by die dag groter geword… baie het gelowig geword…

Hoe het hierdie mense die kerk laat groei?

Keer op keer, in al die gedeeltes uit Handelinge wat hier bo gelys word, hoor mens dat hulle een van twee dinge gedoen het toe die kerk gegroei het: Hulle het óf uit die Bybel gepreek, óf uit die Bybel geleer. (Ek is nie seker presies waar die streep tussen preek en leer is nie.) Beginsel #1 is dus:

#1 Preek die Bybel en nie jou eie inhoud nie.
Jy kan dalk nou vertel dat Lees voort

Sou jy hom gekorrigeer het?

Die onderstaande storie is so ampertjies waar. So hier en daar is klein detailtjies verander om die skuldiges te beskerm.

Koos* (nie sy regte naam nie) weet dat sy godsdienstige, konservatiewe Dopperkerk-neef, wat gereeld kommentaar op sy plasings lewer, selibaat gay is. Koos is ook Facebook-vriende met ‘n liberale pastoor. Op ‘n dag skakel Koos na ‘n kritiese artikel oor ‘n politikus, wat onder meer beskuldig word dat hy “homofobies” is. Gay sake was nie eintlik waarom Koos die artikel gedeel het nie, maar die pastoor het onmiddelik gereageer deur te vertel waarom en hoe die politikus se houding teenoor gays verkeerd is. Waarop die godsdienstige neef, wat moeite doen om sy natuur in toom te hou, vir die pastoor vra: “Het jy al ooit jou Bybel gelees?”

Nou ja, die twee ken mekaar nie. Die een weet nie die ander is ‘n predikant nie. Die ander weet nie dat as hy vooroordele teenoor gays wil verminder, hierdie man iemand is wat sy boodskap dalk nodig het nie. Liberale Pastoor beskuldig Gay Neef toe van ‘n liefdelose houding teenoor gays, terwyl die kanse goed is dat Gay Neef ‘n meer genadige interpretasie van die Bybel oor die saak sou kon waardeer, as die pastoor net sou gekies het om hom daaraan bloot te stel.

Nie lank daarna nie pos die gay neef ‘n meem op Facebook met hierdie woorde:

It takes a real man to live for God – a lot more man than to do whatever you want.

Eers dink Koos sy feministiese suster gaan reageer: “Mans wat reg doen, is nie meer man as mans wat verkeerd doen nie! Man wees is ‘n biologiese feit, nie ‘n stelling oor karakter nie! Om goed doen met manlikheid te vereenselwig is ‘n belediging vir vroue, en ‘n ‘n voorbeeld van die No True Scotsman Fallacy!”

Maar sy doen dit nie. Dis haar neef ook, en kan ook raai van die stryd wat hy stry, die eensaamheid waarteen hy sukkel. Hy doen wat hy glo goed is, en vermy wat hy glo sleg is, teen ‘n hoë koste vir homself. Hy is tegnies verkeerd oor man wees, maar in ‘n wêreld wat hom om ander redes vertel hy is nie man genoeg nie, gaan sy nie nog ‘n rede vir man wees by hom wegvat nie.

Damestee

Kolwyntjies, servette en deftige glase,
Stoele met strikke en blomme in vase.
Fyn teekoppies, mooi bordjies en pienk gedekte tafels
Eenkant staan kaaskoek en ‘n hele hoop wafels.

Die spreker in die kerksaal vertel hoe sy siek vroue grimeer – Lees voort

Die 500 gewones, die solo rykes: ‘n Storie oor kerk wees

Al die kinders in die gehoor was dit eens: “500 in my taxi” was hulle gunsteling.
Dit was ‘n melodrama by die kerk so 2 dekades gelede, en een van die items was ‘n klompie kinders wat die passasiers in ‘n minibus-taxi voorstel terwyl ‘n Leon Schuster-liedjie speel.
Die kinders op die verhoog druk hulself stywer in sodra nog kinders bykom op die stoele wat die taxi se sitplekke voorgestel het. Ek onthou nog twee met dik opgestopte boude en arms vol plastieksakke wat indruk in die oorvol sitplekke. ‘n Paar gooi goed by die “busvenster” uit. Op een stadium maak ‘n kind of hy sy neus blaas in ‘n bondel toiletpapier. Kykers in die voorste rye koes geskok toe hy die “vuil” toiletpapier in die skare ingooi. Lees voort

Teologie studeer? Ek?

Jy wil eintlik ‘n vroue-dominee word“, verklaar my neef, by wie se slaghuis ek op daardie stadium gewerk het. Ek was 18, en die idee het regtig nog nooit by my opgekom nie. Ek het nog nooit ‘n vrou op ‘n preekstoel gesien nie, en kon myself dus nie eers daar verbeel nie.

So twee jaar terug vra een van die Rhema-pastore my of ek op ‘n kursus wil gaan waar ons geleer gaan word om ander in geslagsgelykheid op te lei. Ek maak toe seker of hulle wel my, ‘n admin klerk wat nie met mense werk nie, daar soek. Haar reaksie was iets soos: “O, op grond van jou blog het ek het gedog jy is ‘n predikant of iets! (Toe wou hulle my nie meer op kursus stuur nie.) Ek was verbaas: Lyk my of my blogs iets reg doen?

Verlede jaar kom ek af op ‘n Facebook-groep af waar iemand wat my dominee was oor my “skinder”:

(Hierdie is die begin van ‘n inskrywing en dan daardie selfde predikant se eie kommentaar op die inskrywing waar ek aangehaal word.)

Huh? Ek is nie ‘n teoloog nie! Ek was nog nooit naby ‘n teologiese skool nie. En ek sal nooit die luukse hê van ses jaar voltyds soos wat die denominasie waaruit ek kom, die NG Kerk, vereis nie. Veral gesien daarin dat mens nie eers noodwendig dan werk kry in daardie rigting nie, klaarblyklik nog meer so vir vroue. (Ek noem die NG Kerk, want dis ook die dominee s’n en hy noem gereformeerde teologie.)

En die pas tel op. Laas Sondag skryf ‘n berader-blogger van Houston, Texas: ” Retha Faurie, a writer in South Africa… and a person I consider to be a good theologian, says [hy haal een van my blogs aan]…”

Hei, wag, ek is nie ‘n teoloog nie. Ek is half trots dat jy my een noem, maar deesdae kan ek kwalik bid. Waarvoor sal ek teologie studeer as ek kwalik kan bid? Wat baat al die kennis, as ek kwalik glo dat ek God self meer verstaan? Gaan ek nie mense van die wal af in die sloot lei nie?

Iets in my hart wens jy was reg. Iewers, vroeër vanjaar, het ek op FaceBook gesit dat ek soms my verbeel ek is op die preekstoel. Maar kerke moet buitendien wegbeweeg van preke wat die middelpunt van alles is, en gemeentes wat “Pastoor Neville se kerk” of “Dominee André se kerk” is -Dit moet God en die hele gemeente se kerk wees.

Gister vra ‘n outisme-verteenwoordiger, ‘n man wat self krities staan teen die Christendom se foute, ‘n ou Facebook vriend wat ek vandag eers in die regte lewe ontmoet het, hoekom ek nie teologie studeer nie. “Ek kan dit nie bekostig nie”, antwoord ek.

“Kyk hierdie video wat my seun gemaak het“, vertel Carla my gisteraand. Die jongman praat oor die roeping uitleef wat God jou gegee het. Twee dinge spring uit in my hart: Ek wil leer (Engels learn) van God. En leer (Engels teach) van God.

Maar die verskonings maal deur my kop: Ek weet nie hoe of waar nie. Ek moet liewer iets prakties gaan studeer wat my vinnig uit werkskaarte deursit kan wegkry. Ek is moeg vir donderse werkskaarte. Ek kan dit nie nog tien jaar doen terwyl ek oor die pos teologie leer in my spaartyd nie. Party dae, as ek heeldag werkskaarte deursit, het ek nie spaartyd vir leer nie. Ek doen werkskaarte, loop huis toe, het kwalik energie vir aandete maak, en klaar geëet slaap ek daardie dae so 10, 11 ure. Intussen vertel my hart hy is reg: Hoekom doen ek dit nie?

Help, Here, want die teologie-ding voel so reg – en so onmoontlik.

As ek wil teologie leer, waar begin ek?

 

Die eerste rugbyspan is nie die enigste mense wat saak maak nie

Die 2 prominentste hoërskole in Welkom (Welkom is ‘n stad, nie ‘n dorpie nie, en het ‘n hele paar hoërskole) hou elke jaar ‘n derby waar hulle hokkiespanne, netbalspanne en rugbyspanne teen mekaar meeding. Meeste jare, in onlangse tye, wen Gouties die meeste netbalwedstryde, die meeste hokkiewedstryde, en die meeste rugbywedstryde. En jaar na jaar berig plaaslike koerante: “Gimmies verpletter Gouties” of: “Gim vermorsel Goudveld“.
Selfs as jy nie van Welkom is nie kan jy seker raai watter Gim-span gereeld wen. Dis nie ‘n derde span of ‘n o. 15- span nie, hulle tel nie vir koerantskrywers nie. Dis nie ‘n span meisies – van watter sport ookal – nie, hulle tel ook nie. Dis nie ‘n seuns-hokkiespan nie, hulle tel ewe min.

Om te tel in hierdie wêreld, moet jy
a) manlik
b) in die eerste span, en
c) in die mees macho sport wees.
Ek dink ons moet ons houding oor wat saakmaak verander. Almal se insette, almal se prestasies tel. Dit sluit die 3de netbalspan en o. 15 hokkiespan in. Dit sluit die verloorspanne in wat hulle beste gegee het. Dit sluit toeskouers in wat met respek en waardigheid hulle span of kind kom ondersteun het. Dit sluit die kind in ‘n minder prominente skool in wat ook sy beste in sport gee, maar wat nie so ‘n goeie span rondom hom het nie.

As ons almal se sukses raaksien, sal ons verander hoe ons oor wenners praat.

_____________

Naskrif: Artikel die dag na die derby geskryf, om praktiese redes nou eers gepubliseer.

Dis tyd om te dink oor “It’s Time”

Ek kry ‘n Whatsapp gisteraand: “Hoe was dit?”

Sy praat van die Angus Buchan gebedsdag. Uuuhhhmmm, wat vertel mens in ‘n paar Whatsapp-woorde? Om deel te wees van miskien Suid Afrika se grootste gebedsbyeenkoms nog ooit  (sien eerste kommentaar vir waarom hierdie sin gekorrigeer moet word) was ‘n belewenis wat ek vir min dinge sal wil verruil. En nogtans voel ek nie heeltemal gemaklik daarmee nie. Lees voort